Síðasta vikan!

Jæja. Nú fer að koma að því. Þetta er síðasta vikan í vinnunni og á föstudaginn förum við suður. Þetta er búið að vera frábært sumar og æðislegt að vera heima á Eskifirði. Ég ætla sko að reyna að koma hingað aftur næsta sumar.
Á laugardaginn er svo árshátíð GF. Það verður væntanlega mikið fjör þá eins og venjulega. Svo er það bara út á þriðjudaginn 30. Bara 8 dagar í það... allt of stutt. Þetta sumar er búið að vera ekkert smá fljótt að líða enda flýgur tíminn þegar maður skemmtir sér.
Það verður samt gott að koma heim. Ég er ekki frá því að ég sé búin að sakna Danmerkur svolítið. Og það eru engin smá verkefni sem bíða eftir manni þar heldur. Við förum beint í það að flytja daginn eftir að við komum og svo er að þrífa og mála gömlu íbúðina auk þess sem skólinn byrjar 2. sept og við fáum hóp af fólki í heimsókn. En það besta er samt að maður græðir smá auka sumar.. hehe. Það er farið að kólna hérna heima en úti heima er enn smá sumar.
Svo get ég auðvitað ekki beðið eftir að sjá litlu prinsessuna þeirra Eyfa og Mæju.
Ætli það sé ekki best að fara að klára eitthvað af þessum verkefnum hérna í vinnunni. Get ekki skilið allt við mig í rusli.
Skrifa aftur þegar ég er komin heim.
Ríkey

Æ... mig langaði eitthvað svo á kaffihús...

Já, 2 síðustu helgar hafa verið frábærar.
Þarsíðustu helgi fórum ég, Haukur, mamma, pabbi og Iðunn Kara til Borgarfjarðar eystri á tónleika með Emilíönu Torrini. Þar hittum við Önnu og Hjölla og skemmtum okkur konunglega. Tónleikarnir voru yndislegir, þeir voru haldnir í gömlu bræðslunni og það var búið að setja kerti út um allt og svo var bátur við hliðina á sviðinu og allt voða kósí. Eftir tónleikana var opið í félagsheimilinu og við Anna drifum okkur þangað. Eftir að hafa staðið þar um stund ætluðum við heim aftur en komumst ekki langt þar sem við hittum fólk sem við þekktum sem var á leiðinni inn. Þá fórum við að leita okkur af stólum en enduðum á því að setjast niður hjá hljómsveitinni og tala við þá allt kvöldið. Okkur var margboðið á aðra tónleika, þeir myndu bara skrifa okkur á lista.... mig langaði SVO... ef ég hefði bara komist... Það hefði ekki verið slæmt að komast á tvenna tónleika með Emilíönu.
Svo þegar við vorum að fara heim seinna þá hittum við kærastann hennar Emilíönu, hann spurði eitthvað út í tattúið hennar Önnu og sagðist vera að vinna þarna. Þegar við vorum aðeins búnar að spjalla við hann og komast að því hver hann væri fór Anna að segja honum hvernig við höfðum komist á Borgarfjörð. "Eruð þið stelpurnar sem komuð með einkaflugi bara til að fara á tónleikana" æpti hann svo allt í einu fram í fyrir henni. Þá var hann búinn að frétta af okkur frá gaurunum í hljómsveitinni, við Anna bara orðnar þekktar. Ekkert smá fyndið. En við hittum samt ekki Emilíönu :( Kannski næst...
Svo á sunnudeginum fórum við smá rúnt í Húsavík og Loðmundarfjörð. Við stoppuðum og týndum steina á leiðinni og héldum svo ferðinni áfram til Húsavíkur þar sem við skoðuð mannabein í kirkjugarði. Svo skruppum við á kaffihús í Loðmundarfirði og hittum þar KK og fjölskyldu. Þetta var voðalega kósí, fólk sem býr þarna í sveitabæ rekur þarna kaffihús á sumrin. Það er sko bara heima hjá þeim og maður borðar bara eins og maður vill af brauði og kökum. Svo fórum við og skoðuðum kirkjuna þar.
Það var sko tekinn haugur af myndum get ég sagt ykkur. Þið verðið bara að koma í heimsókn og skoða. Fyrir þá sem ekki vita þá er þetta enginn sunnudagsrúntur sko. Þvílíkur jeppavegur, ekkert smá brattur og maður er heillengi að keyra þetta. Við vorum ekki komin heim á Eskifjörð fyrr en eftir kl. 12 á miðnætti. En þetta var ekkert smá gaman og það er ekkert smá fallegt þarna.

Síðasta helgi var svo eins og allir vita Verslunarmannahelgin. Mér tókst nú reyndar að verða veik á fimmtudaginn og er enn en það gerir lítið til. Maður lætur svoleiðis smáræði ekki stoppa sig.
Á föstudaginn fór ég upp í sumarbústað til Línu og Gumma og gisti þar. Það var svaka fjör hjá okkur, spilað út í eitt alveg til klukkan hálf eitt. Þá sofnaði Lína... í miðri setningu... þannig að við fórum bara í háttinn. Um morguninn var steik úti og maður ætlaði varla að tíma að fara upp í bíl til að keyra á Norðfjörð. Ég var svo þar með familíunni og fór á Papaball um kvöldið. Það var ekkert smá troðið, allt allt allt of margir inni í Egilsbúð og skórnir mínir allir lemstraðir eftir ballið. Svo fór ég og hitti lögguna og fékk far heim ;)
Það var svo bara slappað af á sunnudeginum því Haukur var í fríi. Ég er allavega mjög sátt við helgina. Það þurfa sko ekki allir að fara til Eyja...

Jæja... þetta er orðin engin smá langloka. Ég vona að einhver hafi enst til að lesa þetta í gegn.
Ses, Ríkey